Staff Reflection Facilitator/Consultant

Introdusaun

Oxfam iha Timor-Leste atualmente iha ofísiu permanente rua ne’ebé baze iha Dili no Rejiaun Administrativu Espesiál Oe-Cusse no Ambeno (RAEOA) ho nia staff national no internasionál hamutuk ema nain hat nulu resin neen. Iha fulan 31 Maiu tinan ne’e Oxfam ofisiálmente lansa ona ninia estratéjia País foun (Country Strategy) ba periodu 2021-2025 ne’ebé ho programa no pillar importante tolu mak hanesan Igualdade jéneru, (justisa Jéneru) Adapta no haforsa reziliénsia ba alterasaun klimátika, (Justisa Klimátika) Ekonomia sustentável no inkluzivu (Justisa Ekonomia). Ho pillar importante tolu ne’e mak sei guia Oxfam hodi kontribui ba atinje ninia meta katak Timor-Leste ida ne’ebé Justu Sustentável no Inkluzivu.

Ho estratéjia país foun ida ne’e, Oxfam muda ninia estrutura tuan iha Marsu 2021 (husi pillar Dezenvolvimentu Inkluzivu, Meius de Subsistensia no pillar Reziliensia) ba programa no estrutura foun ne’ebé kompostu husi pillar Justisa Jéneru, Justisa Klimátika no Justisa Ekonomia. Alende ida ne’e, mudansa signifikativu rua importante husi estratéjia país foun ne’ebé sei kontribui ba programa Oxfam nian durante tinan lima oin mai mak advokasia no influensia polítika públiku ho baze evidénsia iha programa hotu-hotu inklui haforsa Transformasaun no inkluzaun jéneru hodi integra iha programa no atividade hotu iha Oxfam Timor-Leste nia servisu.

Dezde tinan hirak liu ba no to’o oras ne’e, Oxfam iha Timor-Leste ninia estrutura hetan mudansa ne’ebé signifikativu. Nune’e, fó efeitu hodi hamenus númeru staff no mós taka ninia edifísiu iha nivel munisipiu hanesan iha Covalima-Suai. Aleinde ne’e, halo mudansa re-estruturasaun internal hodi adapta no ajusta papél no responsabilidade foun ba staff sira ne’ebé iha no mós rekrutamentu ba staff foun ne’ebé sei hamutuk ho Oxfam iha tinan ida ne’e ba oin. Oxfam mós re-estrutura no klareza ona papél no kompozisaun Senior Leadership Team (SLT), inklui mos hahu ona journada atu sai organizasaun ida ne’ebe jender transformative no adopta prinsipiu feminista balun tuir kontextu servisy Oxfam iha Timor-Leste

Situasaun hirak ne’ebé temi iha leten nesesita duni atu ita halo reflesaun ida ne’ebé kle’an entre staff foun no atual iha Oxfam atu bele asegura katak Oxfam nia re-ajustamentu estrutura foun no mudansa ba staff sira, inklui ita nia edifísiu, no prosesu jestaun internal sei efetivu liu hodi kontinua apoiu implementasaun programa sira no mós ita nia servisu ho parseiru sira hotu tuir dokumentu estratéjia país foun ba periodu 2021-2025 no dokumentu estratejiku sira seluk. Alende ne’e iha prosesu reflesaun ida ne’e, Oxfam hakarak haforsa liután efetividade servisu koordenasaun no komunikasaun entre pillar no programa sira hodi hametin modelu servisu ekipa ida ne’ebé forte no sustentável liután ba oin. 

Kontextu

Konsidera depois de tinan ida mudansa estrutura internal Oxfam nian no estratéjia país foun Oxfam ba periodu tinan 2021-2025 ne’ebé foin lansa ofisiálmente iha fulan hirak liu ba inklui mós Transformasaun SMT ba CLT ne’ebé foin realiza iha tinan ida ne’e. Oxfam konsidera katak sekuensia husi eventu importante sira ne’e presiza selebra hamutuk entre Oxfam nia staff sira no iha oportunidade hanesan fasilita staff Oxfam tomak hodi halo reflesaun ba ita hotu nia atinzimentu sira no mós apresiasaun ba staff hotu ne’ebé kontribui ba rezultadu ida ne’e.

Nune’e Oxfam iha Timor-Leste hakarak hala’o retiru hamutuk ho ninia staff durante loron tolu hahú husi loron 12-14 Marsu 2024 kona ba fatin sei konfirma (TBC). Programa retiru hamutuk ho Oxfam nia staff ne’e sei atende husi staff iha Dili no mós Oe-Cusse. Partisipante sira ba programa reflesaun ida ne’e mais ou menus ema nain 30 liu kompostu husi staff nasionál no Internasionál.

Objetivu sira ba Oxfam nia reflesaun staff mak:

1. Atu refleta implementasaun OiTL nia Estratejia Paíz 2021-25 liu husi identifika lakuna sira partikulármente foka ba integrasaun iha pillar tolu ne’ebé OiTL opta.
2. Atu refleta efetividade no dezafiu sira iha ita nia aproximasaun influensia & advokasia nian iha nivel nasionál regional no internasionál durante tinan kotuk.
3. Promove no haforsa ekipa ne’ebé forte ho espiritu ekipa ida ‘One Team Siprit’
4. Renova staff foun no atual nia kumpriensaun kona-ba Oxfam nia prosesu no prosedura sira no mudansa sira ne’ebé akontese iha sistema finansa, rekursus uman no operasoens.

Servisu ne’ebé sei kobre mak:                          

Konsultór/a espekta atu fornese servisu sira mak hanesan:

Faze inísiu: servisu sira iha pre- staff reflection.

• Preparasaun kona ba konteúdu, material,ajenda retiru, no apresentasaun sira, no konsulta ho Ekipa Taskforse Oxfam. Apresenta no hetan aprovasaun husi Country Director Oxfam ba planu no preparasaun hirak ne’e.
• Sujere atu iha formatu ekipa servisu no diskusaun grupu ne’ebé bele asegura katak iha partisipasaun ativu husi partisipante sira.
• Sujere atividade ekipa ne’ebe kreativu no inovativu hodi haforsa espiritu Ekipa Ida ‘one team spirit’ entre staff Oxfam iha Timor-Leste.

Faze segundu: servisu sira durante staff reflection.

• Fornese servisu ne’ebé di’ak hodi fasilita implementasaun workshop ka enkontru, maioria iha Tetun. Staff internasional sira sei hetan asistensia husi staff  Oxfam rasik hudi halo tradusaun.

Faze terseiru: servisu sira hafoin staff reflection.

• Prepara relatóriu Sumáriu inklui rekomendasaun no asaun prátikavel sira tuir kada ajenda reflesaun.

Sasukat ba rezultadu/output sira

• Aproximasaun ba workshop: Notulénsia ba agenda no matéria sira
• Fasilitador nia prezensa durante implementasaun workshop
• Partisipasaun iha enkontru no preparasaun hamutuk ho Oxfam nia Taskforce ba reflesaun.
• Apresentasaun planu reflesaun ba Country Director hodi hetan aprovasaun.
• Relatóriu narrativu kona ba staff reflection nian ne’ebé inklui rekomendasaun no asaun pratikavel sira.

OiTL nia Responsabilidade:

• Fornese informasaun no feedback kona ba inisiativa no objetivu save sira. Fornese dokumentu save sira ne’ebé presiza hanesan dokumentu estratéjia país foun Oxfam nian, prinsipiu parseria no Planu operasaun país nian.
• Fornese informasaun sira ba konsultór/a no tradutór ne’ebé selesionadu tuir determinasaun tempu ne’ebé iha hodi bele fasilita servisu ne’ebé di’ak ba Oxfam staff nia reflesaun
• Durante atividade reflesaun loron 2 Oxfam sei fornese akomodasaun ba konsultór/a no tradutór hodi suporta sira nia servisu.
• Diretór País nudár Pontu fokál úniku ne’ebé responsavel hodi reprezenta Oxfam iha Timor-Leste no sei apoiu ba prosesu foti desizaun relasiona ho partisipasaun no prosesu reflesaun ida ne’e.

Orsamentu ba servisu konsultasaun:

Konsultór/a sei aprezenta proposta inklui mós nia CV. Proposta ne’e sei inklui estimasaun tempu no esforsu ba kada responsabilidade servisu inklui mós kustu servisu kada loron nian. Kustu sira ne’e sei bazeia ba konkordánsia hamutuk bazeia ba servisu ne’ebé sei oferese inkluzivamente no inklui mós taxa.

Hahán, material workshop no akomodasaun sei oferese husi Oxfam durante reflesaun staff loron tolu nian. Transporte ba mai husi fatin workshop  sei fornese bainhira presiza.

Entrevista:

Prosesu entrevista sei arranja bazeia konsultór/a ne’ebé tama ba selesaun. Konsultór/a sei hetan selesaun bazeia ba prinsipiu tuir proposta valór osan ne’ebé konsideradu.

Supervizaun:

Konsultór/a sei relata ba Country Director  & Diretór Programa, servisu besik ho ekipa Taskforce ba Reflesaun.

Durasaun tempu ba Servisu Konsultasaun

Estimasaun tempu ne’ebé sei aloka ba kontratu servisu ida ne’e mak durante loron 10 tempu servisu nian, inklui ona servisu sira pre- reflesaun, durante reflesaun no hagoin reflesaun.

Rekerimentu Minimum ne’ebé presiza mak

• Remata Universidade ho nivel ekivalente iha área estudu Siénsia Sosiál, Jestaun Rekursu Humanu, Formasaun/Edukasaun iha Jestaun Programa ka estudu relevante sira seluk
• Demonstra nia abilidade iha negosiasaun buka solusaun ba diferensa hanoin ka perspetiva sira
• Iha abilidade fasilita refleksaun /workshop ba staff organizasuan international sira.
• Iha abilidade di’ak tebes ba komunikasaun no mós hakerek ho analitiku
• Hatudu esperiénsia servisu kona-ba fasilita ona workshop sira relasiona ho mudansa jestaun no mós haforsa ekipa (team building), ho grupu númeru nato’on no mós ho grupu boot liu antes.
• Iha ona experiensia servisu hamutuk ho Oxfam iha Timor-Leste sei sai vantajen.
• Iha abilidade hodi fasilita ho lian Tetum no Ingles   

Entrevista ba konsultór/a ne’ebé selesionadu sei hala’o ho ekipa painél hodi avalia ninia kualifikasaun no koñesimentu. Rekoñesimentu sei haruka deit ba konsultór/a ne’ebé tama iha lista kandidatu ne’ebé eskolla.

Data ikus submete aplikasaun mak 22 Fevereru 2024. Ita boot sira bele manda aplikasaun ba Benigna Vicente Martins liu husi email [email protected]

Karik iha pergunta tékniku ruma relasiona ho all-staff reflection, bele kontaktu Cris Caetano nu’udar Staff Reflection Taskforce Lead, [email protected] .